89 කළබල අස්සේ අයිස් පලම් කෑවෙමි....

89 ජේවීපී කලබල පටන් ගන්න කාලෙ අපි හිටියේ මාතර ගමේ ගෙදර,
අම්මයි තාත්තයි දෙන්නම ඉගැන්නුවේ  ගමේ ඉස්කෝලේ,
ඉස්කෝලේ නිවාඩු දුන්නා කලබල නිසා,
ඈත පැත්තක මිස්ලා වගේකුත් අපේ ගෙදර නැවතුනා ගෙවල් වල යන්න බස් නැති නිසා,
ලයිට් කනු කපලා , බස් ගිනි තියලා, පාලම් බෝක්කු කඩලා නිසා කොහෙවත් යන්න එන්න බෑ,
මට මතකයි තාත්තා එක්ක පයින් ගිහිල්ලා භූමිතෙල් කෑන් දෙකක් ගෙනාවා ෂෙඩ් එකෙන්,
ඒක අරගෙන එනකොටත් පොළිස් ජීප් එක නවත්තලා ඇහුවා කෙහේද ගියේ කියලා, ඕඅයිසී මහත්තයා කිව්වා තාත්තට සර් ඉක්මනට ගෙදර යන්න අරුං ඇඳිරිනීතිය දාලා කියලා,
ඒ වෙනකොටත් සහෝදරයෝ තුන්ඩු බෙදලා කඩ වහන්න අරගෙන,
අපි කිලෝමීටර් 2 වගේ පයින් ඇවිදගෙන ගෙදර ආවා,
ගොඩක්ම තරුණ සහෝදරයෝ අම්මගෙයි තාත්තගෙයි ඉස්කෝලේ ගෝලයො නිසා කරදරයක් උනේ ම නෑ....

ලයිට් නැති නිසා වේලාසනින් කාලා නිදා ගන්නවා ,
ඒ කාලේ හරිම බයෙන් තමා හිටියේ,
පොඩි උනත් මොකක් හරි අවට වෙනවා කියලා තේරුනා,
හිටපු ගමන් පොලීසියෙන් ගෙවල් වලට පනිනවා, හමුදාවෙන් එහෙ මෙහෙ යනවා, වෙඩි සද්ද නිසා අම්මලා ගෙදරින් එළියටවත් බහින්න දුන්නේ නෑ...
මාස ගානක් ගමේ මේ වගේ හිරවෙලා ඉන්න කොට තාත්තලගේ දුරින් නෑ වෙන  කට්ටියක් ඉන්නවා ගමේම ටිකක් දුරින් වෙන්න,
ඒගොල්ලෝ ආවා දවසක් මොකක්හරි වැඩකට,
ඇවිල්ලා යනකොට මාවත් එක්කන් ගියා එහෙ දවස් දෙක තුනක් ඉඳලා එමු කියලා,
මීට ඉස්සර එහෙ ගියාට නැවතිලා ඉඳලා නැති නිසා මමත් පැනලා කැමති උනා,
ගේ ඉස්සරහම ලොකු පේර ගස් , ලොවි , අඹ වගේ පළතුරු ජාති ගොඩක් එහෙ තිබුනා,
ඒ ගාල්ලේ ලොකු තාත්තගෙ ගෙදර,
ගාල්ලේ ලොකුඅම්මා තමයි මාව එක්කන් ආවේ.
අයියලා දෙන්නා එක්ක සෙල්ලං කරන්න තමයි මේ ආවේ,

ලොකුඅම්මගේ ගම ගාල්ල නිසා ගාල්ලේ ලොකුඅම්මා කියලා තමයි අපි කිව්වේ,
ඉබේටම ලොකු තාත්තා ගාල්ලේ ලොකුතාත්තා උනා,
එහෙ ගියාම මී කිරි කෑම වරදින්නෙම නෑ,
ගාල්ලෙ ලොකුතාත්තා මී හරක් ඇතිකරා ,
කුඹුරු තිබුනා ඒගොල්ලන්ට, හුනුසාල් බත් කියලා කිරිබත් වගේ එක්ක හදනවා උදේට කන්න,
ඒවා කන්න හදන්නේ පොල් මැල්ලුමක්,
ඒ පොල් මැල්ලුමේ රස තාම දැනෙනවා වගේ,
අඹ කොට වල තියෙන ලේන හතු දාලා තමයි ඒ පොල් මැල්ලුම හදන්නේ,
ගොඩක්ම ගාල්ලේ ලොකු අම්මලාගේ ගෙදර යන්නේ වෑදමට හදන මේ කෑම කන්න,
ගොයං කපන කාලෙට ලොකු අම්මා හදන වෑදම කන්න පුළුවන් බඩ පැනෙකං,
ඒ තරං රහයි,
මී කිරි කන්නත් කිතුල් පැණි මුල එල්ලලා තියෙන්නේ දුම් මැස්ස ලඟ,
ඒකේ යටම තියෙන වැලි හකුරු එක්ක තමයි ලොකු තාත්තා කිරි කන්නේ.
කට පිරෙන්න ලොකු වැලි හකුරු කෑල්ලක් දාගෙන සූප්පු කරාම තල්ලත් එක්කම හීරෙනවා,
ඒත් ඒ රස නිසා ඇතිවෙන්න කනවා,
ගමේ ඉන්නකොට ඉරිදා පොළ දවසට අයිස් ක්‍රීම් බයිසිකලයක් එනවා,
ගෙදර අයිස් පෙට්ටියක් තිබුනේ නැති නිසා කොහොමහරි ඉරිදට අයිස් ක්‍රීම් එකක් කනවා,
ඒත් හැම දාම නෙමෙයි, ඉඳලා හිටලා තමයි,
ඒවා කෑවම බඩේ ගාය හැදෙනවා කියලා අම්මා අරන්දෙන්නේ ඉඳලා හිටලා.
ගාල්ලේ ලොකුඅම්මලගේ ගෙදර ගියාම එහෙම නෙමෙයි අයිස් පලම් හදලා දෙනවා ඇති තරං කන්න,

ඒ ලොකුඅම්මා ගාල්ලේ  නිසා ගමේ අයට වැඩිය කෑම ජාති එහෙම හදන්න දන්නවා කියලා අපේ අම්මා කියනවා ඒ දවස්වල,
අයිස් ක්‍රීම් කෝ‍ටුව වගේ කෝ‍ටු වලට ගහලා පාට කරපු අයිස් පලම් දෙනවා අපි ගියාම,
සමහර දවස් වලට දිවුල් වලිනුත් හදනවා,
ඒත් මේ ජෙවීපී කාරයෝ ලයිට් කනු ඔක්කොම කපලා පාරේ වයර් හැමතැනම,
මේ පාරනං අයිස් පලම් කාලා ඉවරයි කියලා හිතාගෙන එහෙ ගියේ,
මුල්ම දවසේ මී කිරි අරව මේවා ඔක්කොම කෑවා...
හවස් වෙනකොට මෙන්න ලොකු අම්මා අහනවා අයිස් පලම් කන්නේ කව්ද කියලා...
විහිළුවට කියලා හිතුන අයියලා ඒත් දෙන්නා දුවලා ගිය නිසා මමත් ඒ පස්සෙන් කුස්සියට දිව්වා,
ඇත්තම අයිස් පලම් ,

http://www.bensdiscountsupply.com/servel-dometic-rk400-kerosene-refrigerator.aspx

ලයිට් නැතුවත් ඒ අයිස් පෙට්ටිය වැඩ,
පස්සේ ලොකුතාත්තා පෙන්නුවේ ඒක වැඩකරන හැටි. යටි පැත්තේ බටයක් වගේ එකකින් භූමි තෙල් වලින් පහනක් වගේ එකක් පත්තු කරලා ඇතුලට දැම්මම තමයි කූල් වෙන්නේ,
ලොකු අම්මා ගාල්ලේ ඉඳලා  එනකොට දෑවැද්දට අරගෙන ආපු එකක්,
හරි පරිස්සමට තමයි  ඒ දවස් වලා පාවිච්චි කරේ,

කිසිදා අමතක නොවන අතීතයක්....