කුණු මාළුවා ක්‍රිස්මස් දූපතේ....

මාළු මාකට් එකේ පළවෙනි කඩේ අයිති මාළුවගේ තාත්තට, 
මාළුවගේ ලොකු අයියා තමයි  මාළු කපන්නේ , 
සල්ලි ගන්නේ තාත්තා,
 නිවාඩු දවසට මාළුවා තමයි අයියා කපන මාළු පත්තර කොලේ ඔතලා සිලි සිලි බෑග් එකට දාලා දෙන්නේ, හාල් මැස්සන්ට මූදු වැලි ඉහින්න ,
 මාළු කපන පිහි හෝදන්න , 
මාළු ලෑල්ල අස් කරන ඒවා තමයි මාළුවගේ ජොබ් එක, 

තාත්තා හරිම සැරයි, 
ලොකු හිල් හිල් තියෙන සුදු මේස් බැනියම ඇඳලා , 
ෂර්ට් එකේ බොත්තම් නැතුව සාක්කුව පිරෙන්න සල්ලි දාගෙන කඹයක් විතර මහත චේන් එකයි නවරත්න මුද්දයි දාලා තමයි මාළුවගේ තාත්තා ඉන්නේ, 
ඉස්කෝලේ නම් ලකුණු කරනකොට වෙන නමක් තිබ්බට ඒ නම කියන්නේ මිස් හරි සර් හරි විතරයි, 
අනික් හැමෝටම ඌ මාළුවා,
ටික කාලයක් යනකොට කුණු මාළුවා උනා, 
ඉස්කෝලේ ඕනේම කේස් එකකට ඉන්නේ මාළුවා හරි උගේ අයියා හරි තමයි , 
කේස් කිව්වේ ගූ කේස් වලට,

අම්මා බලෙන් ඉස්කෝලේ එව්වට ඉස්කෝලේ ඇරිලා කෙලින්ම මූ යන්නේ මාකට් එකට,
ටික කාලයක් යනකොට තාත්තගේ බිස්නස් එක මාළුවගේ අයියා කරන්න ගත්තා,
තාත්තා ටෝලර් එකක් අරගෙන ඒ බිස්නස් එක අපේ මාළුවට කරගෙන යන්න දුන්නා,
මාළුවා ඉගෙනගන්න ගමන්ම මාළු කොරල් රට යවන සීන් , 
මෝර වරල් , එක එක සීන් පටන් ගත්තා,
කාලයක් යද්දී මාළුවා සෙට් වෙන්නේ ඉස්කෝලේ බිග්මැච් කාලෙට විතරයි, 
උගේ බිස්නස් නැගලා ගිහිල්ලා ,
ගේම ගහගෙන ඉන්නවා බං කියලා තමයි කථාව පටන් ගන්නේ, 
මාළු ගැන බිස්නස් ගැන කථා කරලා ආයි හම්බෙමු කියලා ගියාට ආයිත් හම්බෙන්නේ අවුරුද්දකින් දෙකකින්,
කාලයත් එක්ක මාළුවව සෙට් උනේම නෑ,
එක එකාගේ ලිස්ට් වලින් ඇවිල්ලා ෆේස්බුකියේ ඉඳලා මාළුවව ඇඩ් කර ගත්තා,
බොහෝම කලාතුරකින් තමයි ඌ ඔන්ලයින් හිටියේ,
මැසේජ් එකක් හරි කොමෙන්ට් එකක් හරි ඉඳලා හිටලා එව්වා,
ඉස්කෝලේ කාලේ කරපුවා , එක එකාට කාඩ් ගහපුවා මතක් කරලා චැට් එකක් එහෙම දාලා යනවා සමහර කාලෙට,
කාලයක් උගෙන් කිසිම ආරංචියක් නැතුව ගියා,
එක එකාගෙන් ආරංචිඋනේ උන්ගේ බිස්නස් එක වැටිලා කියලා,
පස්සේ දවසක ෆෙස්බුකියේ ඉන්නකොට කාලයක්ම දැකපු නැති මාළුවා ඉන්නවා ඔන්ලයින්,
මහ රෑ මමත් කණ සාක්කුවේ දාගෙන මර වෙලා ඉන්න වෙලාවක මූත් එක්ක චැට් කරේ මෙන්න මේ වගේ..
අඩෝ මාළුවා කොහොමද බං..
අඩේ මචං මම ක්‍රිස්මස් අයිලන්ඩ් බං ..
ඒ මොකක්ද බං අළුත් පොට් එකක් ද....
උඹට පිස්සුද බං ගිය සතියේ ආවේ , සෙට් එකම මාට්‍ටු උනා බං...
අපෝ උඹලා චා නේ බං , දවස් ගනං ඉන්නවද බං ඕවට ඇවිල්ලා...
අඩෝ උඹ බීලද බං , මම මේ ඉන්නේ ක්‍රිස්....
හරි හරි බං උඹ එක පාරක් කිව්වනේ , දැං කොහොමද උඹ ඔන්ලයින් ආවේ, මොකක්ද වෙන්න ඕනේ..
මම මෙච්චර වෙලා මේ කට්ට කාගෙන ඔන්ලයින් හිටියේ ගෙදරට පනිවිඩයක් යවන්න බං ,උඹ මේ හු.. කියනවා...
හරි හරි බං මළ පනින්න දෙයක්ද , දැං මොකක්ද අයියට කියන්න ඕනේ..
අයියට නෙමේ ප.....අම්මට පුළුවන්නම් පනිවිඩයක් ඇරපං අපි යහතින් ආවා හෙට අනිද්දට කෝල් එකක් දෙන්නං කියලා, බෝට්‍ටුව උං අල්ලගෙන ගිනි තිබ්බා, තාත්තට ඒක කියන්න එපා කියපං,

අඩෝ කුණු මාළුවා උඹට පිස්සුද බං මේ මහ රෑ බෝට්‍ටු පදින්න, 
අනේ මචං පිං සිද්දවෙයි මම මේ ඉන්නේ ඕස්ට්‍රේලියවේ ක්‍රිස්මස් දූපතේ , අයියයි මමයි තව සෙට් එකක් අරගෙන ආවේ,අපි දෙන්නා තාත්තගේ බෝට්‍ටුව අරගෙන ආවේ , අම්මට පනිවිඩේ කියපං , මම පස්සේ ඔන්ලයින් එන්නං, බායි..
වෙරි හිඳුනේ උගේ මේ කථාව දැකලා,
පස්සේ ලංකාවේ එකෙක්ට මහ රෑම කෝල් කරලා මේ විස්තරේ කියලා කිව්වා මාළුවගේ ගෙදරට ගිහිල්ලා අම්මට පනිවිඩේ කියන්න කියලා...
ඊලඟ දවසේ පත්තරේ දැක්කා ලංකාවෙන් යන බෝට්‍ටු අල්ලගෙන ගිණි තියලා කියලා,
ඒ අතරේ මාළුවගේ  තාත්තගේ ඩෝරා එකත් තියෙන්නෙ ඇති...
ඊට පස්සේ ඉඳලා අද වෙනකං මාළුවා ඔන් ලයින් ආවේ නෑ...
හෙට අනිද්දට අළුත් පිංතූරයක් එක්කම පෝස්ට් එකක් දානකං බලං ඉන්නේ.....

තාත්තා දැනගත්තොත් බෝට්‍ටුව ගිනි තිබ්බා කියලා , අයියයි මූයි ලංකාවට ඇවිල්ලා ඉවරයි ...